Closed

أول تااااااااااااااااااااااااااج

عذرا على الإنقطاع الطويل لكن مشغول الأيام دى بصورة وحشة اوى .. ادعولى

وصلنى تاج من بذرة أمل

وطبعا أنا عارف الجماهير قاعدة مستنية وعاملة مظاهرات وإضرابات عشان أنزل بوست جديد فقولت ألبس التاج على ما ربنا يفرجها وأفضى شوية ..

قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟

عصر الدولة الجمهورية الحديثة فى عهد فخامة الرئيس محمد حسنى مبارك (أطال الله عهده ) ... وده لأنه العصر اللى انا عايشه فعلا وتماشيا مع الواقع هعيش فيه وأحاول أخليه زى عهد محمد على مثلا بس بشوية تعديلات أملاها عليا علقى البائس ..( الحدق يفهم بقى ) ...

أول أولوية فى حياتك عيلتك ولا شغلك ولا اصحابك؟

عيلتى ..

ايه أكتر حاجة بتحبها فى رمضان ؟

وقت قبل الفطار بساعة .. وصلاة القيام والتهجد فى العشر الأواخر .. ووقت أذان المغرب فى أخر يوم من رمضان ..

اوصف أجمل فطار ممكن تفطره؟

فطار مع صحابى فى مكان مفيش غيرنا فيه .. صباح الجنان اللى بيحصل :)

لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟

صعب اوى أجزم انى هكون عادل ولكن النية انى هكون عادل .. اما بقى أتأكد انى حاكم عادل فدى تقترب وبشدة من المستحيل ..

مين أكتر اعلامى مصرى بتحترمه ؟

أحترمه .. منى الشاذلى

اما أحبه .. عمرو أديب

لو ممكن تشتغل شغلانة تانية كنت تتمنى تبقى ايه ؟؟

صحفى

ايه تانى بلد تتمنى تعيش فيها بعد مصر ؟؟

أعيش فيها بصفة دائمة .. مفيش ..

لكن لو عمل او زيارة .. أحب أروح دبى على المستوى العربى .. وألمانيا وفرنسا على المستوى الاوروبى .. وماما أمريكا على المستوى ..... امممممممممممممم .. مش عارف .. أى مستوى بقى

وطبعا مننساش محاربى الساموراى من الحكاية .. من الأخر عاوز ألف العالم .. ليه لأ ؟

اوصف ترتيبات اجمل فرح ممكن تحضره ؟

انا مبحبش دوشة الأفراح العادية ولا اللى بيحصل فيها .. ولا بحب جو الأفراح اللى بيطلق عليها إسلامية ..عشان كده غالبا مبحضرش حفلات أفراح وبكتفى بالذهاب للمسجد .. اما أجمل فرح حضرته .. هو فرح صديق عزيز جدا كنا إحنا فيه المعازيم وأصحاب الفرح والفرقة اللى قامت بالفرح .. فكرة كانت كويسة وجديدة

بتراعى كلام الناس والقيل والقال ؟؟ ولو اه او لا قول ليه ؟

إلى حد ما براعيه ..لأنى جزء من المجتمع وأكيد كلام الناس عنى بالحلو او بالوحش ليه أسباب متعلقة بيا .. لو الأسباب دى صح بحاول أعالجها ولو غلط بشوف ايه اللى بيخلينى أتفهم غلط .. هذا لاينفى طبعا ان فى حاجات معينة الواحد ممكن يسمعها او يعرفها ويطنش ..

صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟

ومكونش سعيد ليه ؟؟ العصر الحالى ليه جماله وسحره وعصر الحمام الزاجل والحمار ابو أربعة سلندر أكيد ليه جماله وسحره ..

هتكيف على الوضع وأعيش العصر ده بجماله ..

السعادة هى ..؟

بإختصار .. الرضا عن النفس وراحة البال ..

لما بتحب تهرب من كل شئ بتروح فين ؟؟

داخل أعماق نفسى ..

امتى اول مرة خدت فيها نفس طويل وقلت ياااه انا فعلا كبرت ؟؟

لسه محصلتش :)

بتشرب سجاير ؟؟ وايه شعورك اما ست او راجل بيشرب سجاير ؟ ليه ؟

لا ولا هشربها إن شاء الله ... ولما أشوف راجل بيشرب سجاير فى مكان عام بالأخص بتخنق جدا منه ومن اللامبالاة اللى هو عايشها .. ولو اتكلمت معاه تحس انه بيدافع عن حاجة من حقه .. على العموم غالبا بعد جدل طويل مع الشخص بنهى الموقف مع الشخص ده برد رذل شوية " حضرتك عاوز تأذى نفسك براحتك ... لكن مش تأذينى جنبك "

اما بقى بالنسبة للبنات فبيكون شعورا مزبهلا ..

صدقا بشفق على عباد البتاعة دى ..

بتعرف ايدك اليمين من الشمال ازاى ؟؟

ايدى اليمين بخبط أخويا بالبوكس بيها .. ايدى الشمال بصد بيها خبطته ..

ايه اكتر موسيقى بتحبها ؟

الموسيقى الهادئة ..

فى رأيك ليه الذوق والنخوة اتعدموا ؟

anti-ay 7aga 7elwa موجودين والله بس احنا اللى لابسين نضارات

ممكن يكونوا قلوا شويتين بسبب طبيعة العصر المتسارعة وأنتشار التفكير الرأسمالى وتغلغله من المؤسسات والشركات لعقول الأفراد ..

لكن لسه موجودين بجد ... لو حد عاوز شوية يقولى أجبله :)

ايه الحاجة اللى لو حصلت لك حتبقى سعيد اوى ؟

1 - ناخد المركز الأول فى مسابقة داخلينها

2 - أتعين فى شركة كبيرة بعد ما أتخرج إن شاء الله

3- أتكعبل فى أم صلاح الدين اللى هتشاركنى حياتى إن شاء الله

تحب يبقى عندك ارض زراعية ولااجنس عربيات ولاكام عمارة ولافلوس فى البنك ؟

لا يبقى عندى فلوس وأجيب بيها اللى انا عاوزه سواء عربية ولا عمارة أو حتى حمارة ..

البحر ولا النيل ؟

أعشق البحر وهو فى قمة هياجه ..

مركب ولا طيارة ؟

الطيارة متعة ..

بالنسبة للمركب .. مجربتش إلا فلوكة .. تنفع ؟؟

مجنون ولا عاقل ؟

مجنون بس بعقل !!!

تقرا كتاب ولا تتفرج على فيلم ؟

نادر جدا لو اتفرجت على فيلم فى التليفزيون .. حتى لو حصل مبكملش نص ساعة وأقوم ..

مبتفرجش على أفلام الا اذا كنت داخل سينما مع صحابى ..

غير كده فالكتاب هو ملازمى الاول وإن كان تراجع بعد إعتمادى على الكتب الإلكترونية ( أوفر بصراحة )

تمرر التاج ده لمين ؟

ما شاء الله التاج ده عامل زى الفيروس منتشر على كل البلوجات ..

أعتقد اللى مشفتش التاج عندهم ..

قلب ينبض لله

فزلوكة

شقاوة شعب

شيخ الأزهر يتحدى الملل

يعلم الله أنى لست من هواة إنتقاد الرموز الدينية ولا من
محبى الحديث بغير علم أو مغالطة من يفوقنى علما بمراحل ولكن شيخ الأزهر أثار ومازل
يثير لغطا شديدا من جراء أراءه وقراراته مؤخرا . منذ أيام قليلة أطل علينا فضيلته
بفتوى " وجوب جلد الصحفيين المروجين للشائعات 80 جلدة "
فى إشارة إلى إشاعة موت الرئيس ولا أدرى على أى منطق استند مولانا فى فتواه .. هل
على الأية الكريمة : "

والذين يرمون المحصنات ثم لم يأتوا بأربعة شهداء فاجلدوهم ثمانين جلدة
" على إعتبار أن الرئيس من
المحصنات مثلا !!! وبغض النظر عن الفتوى وعن منطقها نطرح تساؤلا : إذا كان فضيلة
الإمام الأكبر مازال متذكرا أن فى الإسلام حدود ويجب أن تطبق .. لماذا لم نسمعه
يوما يقول بقطع يد السارق أو رجم الزانى ؟؟ أم أن لمثل هذه الحدود أبعادا سياسية
أخرى ؟!!

- بعدها بأيام يصدر قرار
من الأزهر بتدريس كتاب الفقه الميسر لطنطاوى بدلا من كتاب المذاهب الفقهية الأربعة
!! أعلم أن الفقه هو إجتهاد فيما لم يرد فيه نص وقد يختلف بإختلاف الزمان أو المكان
كفتوى الإمام الشافعى لكن كيف لنا أن نتخيل عالما أزهريا لا يعلم بالمذاهب الأربعة
وأقصى مراجعه الفقهية هو فقة الإمام طنطاوى !! كيف تتوافر له القدرة على مقارنة
المسائل للوصول إلى الإجتهاد المناسب ؟؟

- وفى برنامج اليوم
السابع لمحمود سعد يخرج علينا شيخ الأزهر ليحلل فوائد البنوك على إعتبار أنها ليست
ربا .. والإعتراض ليس على فتواه فهى إجتهاد سبقه إليه غيره ويؤجر عليه بأجر أو
أجران .. لكن الكارثة كانت فى إنكاره أنه حرم فوائد البنوك من قبل عندما كان مفتيا
للديار المصرية واصفا من يقول ذلك بأنه " كذاب.. كذاب ..
كذاب " لنفاجأ بعدها ببيان من جبهة علماء الأزهر يكشف فتواه القائلة بتحريم
أموال البنوك فى فبراير 1989 عندما كان مفتيا للديار المصرية !! بالطبع
لا تعليق ..

شيخ الأزهر من تانى
عندما نتحدث عن رجل بأهمية شيخ الأزهر فمن المفترض أننا نتحدث عن شخص مثل العز بن
عبد السلام .. لا يخشى فى الحق لومة لائم .. ولا يشكل الدين على شاكلة النظام ووفقا
لإحتياجات الحكومة الحالية .. فلماذا لا يكون منصب شيخ الأزهر بالإنتخاب وليس
بالتعيين على مزاج سيادة رئيس الجمهورية ؟؟ ولماذا لا تكون له حصانة تمنحه الإنسلاخ
من عباءة السلطة كالقضاة و أعضاء مجلس الشعب ؟؟

و هل ترى شيخ الأزهر
الحالى سيستمر فى منصبه ؟؟ وكيف ومتى نجد الأزهر مؤسسة قوية مستقلة تؤثر فى الحاكم
والحكومة ولا تتأثر بهم ؟

أسئلة تطرح نفسها ..
ونتنظر تعليقكم عليها ..

طوبى وطوبة !!

" طوبى للصياع وطوبى للمتشردين ... وطوبة للبصاصين والمخبرين ! "

هذه الجملة هزلية الشكل .. جادة المضمون ليست إحدى مقولاتى المأثورة ولكنها موخرة المقدمة التى كتبها الأستاذ محمود السعدنى فى كتابه ( مصر من تانى ) .. وبالرغم من أن النسيان هو العلامة المميزة لى بين أقرانى إلا أن خلايا عقلى اللعينة لم تجرؤ يوما على نسيان الفكرة التى قدمها الأستاذ محمود السعدنى بالرغم من عتاقة عهدها وبالرغم أيضا أنى لست من القراء الدائمين لأعماله !!

الكتاب يعطى ومضات على تاريخ مصر لكن من زاوية متفردة .. لا يتحدث عن الأمراء والملوك والرؤساء ولكن يتطرق إلى العمال والفلاحين والتجار والأدباء والمثقفين فى عصور مصر المختلفة .. يرى الأستاذ محمود أن مصر هى شعبها بدءا من الجياع والمشردين مرورا بالمثقفين والمبدعين وصولا إلى قادة الحركات الشعبية فيقول" مصر أيام عبد الناصر لم تكن الرئيس ونوابه والمخابرات وأجهزة الإتحاد الإشتراكى ولكنها كانت العمال والفلاحين والرأسمالية الوطنية والجنود والمثقفين " .. ومن هنا كانت فكرة مدونتى .. سأعبر عن رأيى كواحد من الشعب .. فلست رجلا سياسيا ولا كاتبا عبقريا ولا شيخا ألمعيا ولا حتى قائد حركة تمردية !!

إنما شابا عاديا كغيره من شباب جيله .. ولكى أكون واقعيا فأنا واحد من الشعب الذى ترهبه عربات الأمن المركزى وهراوات رجال الشرطة ولذلك سأحاول تلافى خوض هذه التجربة يوما ما !!

سأقدم ما أراه إيجابيا كان أو سلبيا .. شعبيا كان أو ملكيا أملا فى الوصول لمصر من تانى .. فــ " هى نظرة رجل من الشارع غير متخصص وعلى غير علاقة رسمية بالتاريخ " كما يقول الأستاذ محمود السعدنى الذى قدم الماضى كما يراه .. أما أنا سأقدم الحاضر والمستقبل كما أراه و ..... ربنا يستر !!

بسم الله الرحمن الرحيم

غلاء أسعار .. قلة موارد .. أزمة تموين .. المعاشات .. السحابة السودة .. القمامة فى الاماكن الاثرية .. سعر الجنيه .. ثورة العطش ..عجز الميزانية .. تراكم الديون وفوائدها .. تلوث مياه الشرب .. الحزب الوطنى .. الإخوان المسلمون .. الفتنة الطائفية .. الانحلال الأخلاقى .. أزمة المواصلات .. الصرف الصحى .. البطالة .. مشاكل التعليم .. التطرف الدينى .. الارهاب .. تعديل الدستور .. قانون الطوارئ ..

المادة 76 .. طب المادة 2 .. المعاكسات .. التحرش الجنسى .. الادمان .. الفقر .. غسيل الاموال .. عمرو زكى .. حسنى عبد ربه .. حرية الرأى والتعبير .. مشاكل القضاة .. العولمة .. العلمانية .. الوهابية ..

السياسة الخارجية .. مصر والسعودية .. إيران .. التطبيع .. المعونات الأمريكية .. الصراع العربى الاسرائيلى .. فلسطين والاقتتال الداخلى .. العراق والإقتتال الطائفى .. لبنان والتدخل الأجنبى .. صراع التسلح .. حروب البترول ....... إلخ

خلااااااااااااااااااااااااااااااص .. الواحد دماغه هتنفجر ..

البلد دى مش عاوزنها خلاص .. هنسيب الجمل بما حمل ونبنى

مصر من تانى ..

...مصر زى ما أحنا عاوزينها وشايفنها .. مش زى ما شايفنها أصحاب السبوبة

اااه والله .. ماكل واحد من دول ليه سبوبة مخلياه يعيش الدور ويحب مصر ..

سواء كان صاحب السبوبة ده من بره ولا من جوه .. مش فارقة .. أهى كعكة وكله بيقسمها ..

كفااااااااااية .. مش عاوزين مصر دى .. احنا عاوزين

مصر من تانى

إنتظرونا ..